Asturies n'otra dómina: 2011

Amás de recomendar llibros nesta páxina queremos que los lleais y que meyor qu'entamar lleendo ún de les hestories escrites por David Fernández, miembru del Grupu de Baille Tradicional San Félix.

¡¡QUIERO SER ASTRONAUTA!!

Por David Fernández

—¡¡Quiero ser astronauta!! ¡¡Quiero ser astronauta!!

Eses pallabres yeren les que Xicu siempre tenía na so boca cuando namás yera un guah.e. Ún d’esos guah.es nos que na escuela llamaben “raru, fatu, antisocial,...” y dellos otros insultos que nun facíen bien a naide.

Pero lo que nun sabíen yera que Xicu, nun yera más qu’un guah.e normal que lo único que quería na vida, polo que naguaba, yera por ser astronauta y poder tar pel espaciu esterior y llegar a la lluna, ser l’asturianu primeru en pisar la lluna.

En casa too yera igual. La ma zumbába-y cada vegada que lu sentía dicir eses pallabres que tantu-y prestaben y que-y ponía la carne gallina:

—¡¡Quiero ser astronauta!!

L´únicu que-y echaba un gabitu nesi sen y animábalu pa siguir p’alantre col so deséu yera Colás. Un vieyu, el más vieyu qu´había en tola rodiada. Colás yera carpintero; taba retiráu, pero entovía facía dalguna chapucina per ehí, que si una tayuela pa nun se quien, que si una garabata pa nun se cual, que si un xugu pa... Él, asina, yera l’home más feliz.

Xicu xubía, si nun podía toles tardes, casi toes, dempués de llegar de la escuela y garrar el bocadillu nocilla que so ma-y tenía siempre preparáu, porque'l guah.e tenía tanta pasión pola nocilla que nun comía otra cosa. Si había daqué que nun-y prestara pa comer, ehí taba so ma la con un bocadillu nocilla; pa Xicu'l meyor de los manxares del mundu.

Xicu corría y corría como si fuxera dalguién o dalgo pa Ca Colás, que taba casi nel monte, xubiendo per La Cuesta San Roque, y namás llegar —ensin bocadillu porque yá lu finara— , echaba mano a los maderos, que-y sobraben a Colás o tenía per ehí tiraos, y taba tola tarde xugando y falando con Colás, que-y cuntaba hestories de cuando yera un neñu y sobre too de cuando foi pa la mili, al desiertu de nun s'onde, cuando la guerra.

Un día Colás atopóse cola ma de Xicu.

—¿Qué fai’l mio guah.e con un homón como usté? Dixo Xosefa —qu'asina se llamaba la muyer.

Colás asustóse porque nunca viere nin falare con aquella muyer; magar que nunca lu trataren asina. De sópitu decatóse de quien yera y dixo-y:

—Lo único que fai ye xugar colos maderos que me sobren y faceme compañía, que toi mui sólo; y falar.

La muyer toa ablucada marchó pa casa pa ver si atopaba per ellí al so fíu. Xusto foi entrar pola puerta casa y ehí taba Xicu sentáu na escalera’l bañu lleendo un llibru d’esos de Lo que los neños quieren saber, un llibru gordu, pergordu con tapones coloraes y col títulu en blancu. Taba nel capítulu que falaba del espaciu, los planetes, la N.A.S.A y sobre too d’astronautes. La ma toa caliente pegó-y un fostiazu que pegó cola cara na paré y mandó-y el llibru a to..., bueno..., lloñe, perlloñe. Xicu entamó a berrar como si talamente fora una oveya, berró y berró fasta que nun pudo más.

Mientres la so ma retrucába-y ensin parar:

—Nun quiero que vuelvas ver a esi paisanu, nin que fales nin pienses más neso del espaciu, nin no de ser astronauta, ¿entendío?

Xicu cola cara toa colorada —y colos cinco deos marcaos na cara—, entamó a correr pa la so habitación a siguir llorando.

Al día siguiente Xicu foi a escuela como tolos díes dempués d’almorzar lo que la ma-y tenía preparao. Tuvo tol día pensando lo que-y dixera so ma la nueche pasada.

Esa tarde quedó en casa cola ma que taba cosiendo, porque desque morrió’l pa na mar tenía que facer daqué pa da-y de comer al guah.e y pa sobrevivir los dos y, como sólo sabía coser, punxo un tallerín en casa. Ehí-y veníen a mercar vestidinos y a face-y encargos toles muyeres del pueblu y dalgunes de la rodiada.

—¿Qué faes en casa Xicu? ¿Nun tienes collacios pa salir a xugar? ¿Los guah.es de clase? Díxo-y la ma.

Xicu nin contestó, nun quería contesta-y, taba perenfadáu cola ma pol fostión y la retranca que-y pegara’l día pasáu.

Asina pasaron lo díes y Colás, con daqué tres la oreya, entamó a preocupase por Xicu. Entrugábase qué sedría d’él, que qué-y pasare. Pero siguía ensin atrevese a dir a casa a velo. Como nun tenía muncho trabayu esos díes garró un llibru d’esos que tantu-y prestaben a Xicu nos qu’había dibuxos de cohetes y entamo a face-y ún cola idea de dir velu namás lu finara. Tardo munchos díes, más de los que pensare cuando entamó, porque quería dexalu como si fora talamente de verdá.

Un día, y ensin que-y diera tiempu a Colás dir velu a casa, acercóse per ellí Xicu. Al vieyu púnxose-y una risa que-y llegaba casi d’oreya a oreya. Xicu entamó a dici-y al vieyu:

—Colás; nun me dexen venir vete pero güei, que nun s’enteró mio ma, escapéme pa poder vete y que me cuentes una d’eses hestories que tantu me presten.

Colás con llárimes nos sos güeyos contestó-y:

—Güei nun te cuento nada, pero voi date una cosa que de xuru va ser meyor qu’una hestoria de les míes. Y con eses dio-y al guah.e’l cohete.

El neñu tou emocionáu al velu que paecía de verdá y casi sin poder soltar pallabra dixo:

—Gra, gra... graci..., gracies Colás.

Dio-y un besu y coló pa casa más contentu qu’unes castañueles.

Llegó pa casa y guardólu bien na casetina que tenía al llau de casa, pente los xuguetes y la ropa de so pá que, desque morriera afogáu naquella tormenta qu’hubo fai dos o tres años d’El Cantábricu colos collacios del so barcu, yera lo único no que la ma nun metía mano.

—Ehí ta bien.

Foron les pallabres que dixo mui contentu enantes de dir cenar pa echase a dormir.

Esa nueche suañó con que yera astronauta y podía tar seguru qu’esta vegada so ma nun lo diba frayar a fosties. Asina durmió fasta’l día siguiente.

Tolos díes diba pa la casetina y sacaba'l so cohete pa xugar. Xugaba abondo col meyor de los regalos que-y podíen facer. A toles hores víeslu col cohete na mano, sólo lu soltaba cuando diba pa casa a facer daqué o vía a so ma pel camín y s’averaba pa él. Asina xugaba y xugaba fasta la hora de dir echase. Tampoco escaecía dir, de xemes en cuando, a ver al so collaciu Colás que siempres tenía un pigacín de tiempu pa él y pa les sos hestories.

Un día, pela mañana, nun se por qué, llevantóse y violu to ermu, atristayáu. A Xicu yá y paeciera que diba pasar daqué porque los perros nun dexaben de lladrar y de pegar aullíos la nueche anterior. Foi pa clas como tolos díes y fizo lo que solía facer dempués. Garró’l so cohete de madera y xubió como un tiru pa Ca Colás. En llegando, la puerta taba zarrada, nun golía a “ducados” de los que fumaba’l vieyu, yera to raro. Baxo pa casa, esperando dalgo raru, con cara pena pensando si-y pasara daqué al so collaciu, el so únicu y meyor collaciu. Al llegar pa casa nin cenó nin y dixo un res a so ma que-y entrugó:

—¿Qué te pasa Xicu?... ¿Tienes dalgo raro?... ¿Quies dicime qué te pasa?

—Nada ma, nun me pasa nada, nun te preocupes— dixo’l guah.e enantes de dexar el platu nel fregaderu y de da-y un besu a so ma pa dir pa la cama.

Costó-y muncho dormir, como va tiempu que nun y pasare. Pero a la fin garro’l sueñu y durmióse. De secute despertóse como si daquién-y tocare nel llombu, a l’altura l’hombru. El guah.e taba pingando en sudor. Llueu, magar qu’intentaba escaecer aquella sensación y poder dormise nun yera quién a ello. Asina tuvo fasta que-y sonó’l reló porque yá yera la hora de dir pa la escuela.

Xicu llevantóse too dormíu, con cara sueñu y cansanciu. Pasó pela cocina pa dici-y nada a so ma y tiró pa la cai:

—¿Ú vas? —dixo-y la ma— ¿Nun ves que tas col piyama puestu y vas pa la cai?

—Perdón ma, siéntolo, nun me daba cuenta, toi entovía daqué dormío— retrucó-y el neñu.

Llavó la cara y demás, almorzó bien, p'aguantar tola mañana ensin pasar fame fasta la hora xintar, dio-y un besu a la ma y tiró pa escuela, pa clas. De camín pa escuela vió una piña xente delantre’l chigre onde se poníen les anuncies, les esqueles y toes eses coses que dicíen ser d’interés. Averóse seliquino a ver qué yera lo que miraben y de sópitu, ensin dicir un res, entamó a llorar y a berrar.

—¿Qué te pasa neñu?— díxo-y una muyer.

—¿Qué ye que lu conocíes?— dixo-y otra muyer de les qu’andaba per ellí.

Toles muyeres y homes que taben ehí entamaron a falar ente dientes y a alborotase.

Ehí taba, de xuru que yera lo que-y ficiera tar mal al guah.e esi día, quiciabes lo que-y ficiera despertase la nueche pasada d’aquella miente, lo qu'enxamás quixera que pasare... Yera la esquela’l so collaciu. Por segunda vegada'l guah.e tornaba a sentir lo que sintiera’l día que so pá morriera na mar y nun tornare enxamás, sentía un mal tar, la soledá...

Pañó la bolsa los llibros y corrió pa casa a galguiaes, como nunca lo fixera y nun momentín llegó a casa. Ellí taba so ma que namás lu vio entrar pola puerta casa quedó ablucada. El neñu metióse nel cuartu, na cama y tapóse entero. La ma entró n’habitación y sentóse a la vera d’él y entrugó-y:

—¿Qué te pasa Xicu?... ¿Qué tienes?...

—Na... na... nada ma— retrucó-y.

—Cuenta-y lo que te pasa a to ma, anda...

El guah.e con ganes de cuntá-ylo too a daquién destapóse, y magar que-y tenía daqué de mieu a so ma, porque yá nun lo dexara nin ver nin andar con Colás, abrazóse a ella y entamó a cunta-y lo que pasara. Tuvieron falando y falando y la ma nin lo riñó nin-y dixo nada. Bueno daqué sí que-y dixo:

—Güei vamos dir despidilu los dos, vamos vistinos bien y vamos dir al cementeriu, ¿paezte?

Xicu díxo-y que si cola cabeza y metióse un pocoñín más na cama, onde lo arropo so ma.

Dempués de xintar vistiéronse los dos y tiraron camín de misa y del cementeriu. Enantes Colás fuere a la casetina y garrare’l cohete que-y ficiera Colás, quería tenelu con él. La ma namás lu vió asustóse y miró pal neñu, como lo vía tan garráu a él nun y dixo nada y dexó que lu llevare. Fueron falando pel camín de cómo yera’l vieyu, el collaciu’l so fíu. Xicu sólo sabía dicir que yera buenu, amás tampoco podía dicir muncho más porque yera pensar nel so collaciu y entamar otra vegada a llorar.

Nel entierru nun había casi naide, taben les muyerones de siempre, les que tán en tolos entierros y mises, y Xicu, agarráu al so cohete y berrando ensin parar, y so ma. El neñu y so ma marcharon enantes de que finara l’entierru porque Xicu nun podía aguantar más.

Esi día, nel que Colás morriera, Xicu tuvo tola nueche ensin dormir dando-y vueltes a tolo que ficiera, tolo que pasara y tolo que-y dixera’l vieyu. Tuvo pensando fasta que cantó’l gallu y sintió llevantase a so ma pa ponese a trabayar. El neñu llevantóse cuando la sintío y foi pa la cocina a falar con ella mientres almorzaben. Tuviera dando vueltes a la idega que toos-y queríen quitar de la tiesta y que Colás nun lu dexara escaecer, la de ser astronauta. Tuvo temblando fasta que s’infló como los paisanos y soltó-y a la ma:

—¡¡Quiero ser y voi ser astronauta!!

La ma quedó ensin respiración. Entós el guah.e como la ma quedare ensin dicir nada

siguió falando:

Sé que nun te presta que te tol día colo mesmu, sé que siempres me quitasti de la tiesta esta idega del espacio y que queríes que trabayare pero lo que quiero ye ser astronauta y asina-y lo prometiere a Colás asina que voi facer por selo.

Dempués d’estes pallabres la ma nun tuvo cosa meyor que facer que dexalu y que ficiere lo que quixere, asina qu'abrazólo y díxo-y:

—Faigas lo que faigas yo taré a la to vera.

Miraron l'ún pa l’otru y entamaron a abrazase y dase besos.

Pasaron los años y Xicu afitóse na idega de ser astronauta y col esfuerzu que yera empobinóse a estudiar y estudiar pa poder selo. Y asina foi, el guah.e medró y fízose un paisanu y con nun sé que beques y histories pudo dir pal estranxeru, pa Estaos Xuníos a estudiar. Y elli ta, na N.A.S.A. trabayando de teúnicu y de xemes en cuando sal pal espaciu a investigar. Pero siempres col so cohete de madera, qu'enxamás se separtó d’él.

Magar que paeza mentira esta historia oyíla yo milenta vegaes y puedo dexavos afitao qu'esi guah.e de pueblu fízose ún de los meyores astronautes del mundu gracies al so enfotu. Y agora nestos tiempos que cuerren ta casáu y tien una bona muyer y ehí ta nos Estaos Xuníos con so ma, que magar que quería quedar nel pueblu ta ellí mui contenta, la so muyer y dalgún otru fíu, dos y ente los que toi yo que cada vegada que mio pá me cunta esta historia toi más arguyosu d’él, de tolo que lluchó por él y por so ma. Asina que yo pa nun ser menos y entamar la tradición familiar siempres digo:

—¡¡Quiero ser astronauta!!

—¡¡Voi ser y quiero ser como mi pa!!

—¡¡¡QUIERO SER ASTRONAUTA!!!

Asturies n'otra dómina

miércoles, 18 de mayo de 2011

Bailles y Dances

miércoles, 11 de mayo de 2011

La ropa

miércoles, 27 de abril de 2011

N'asturianu presta más

Pa dir pa la cama

miércoles, 20 de abril de 2011

Biblioteca María Xosefa Canellada

La nuesa música

Patriband

¡¡QUIERO SER ASTRONAUTA!!

A LA GUETA LOS SUAÑOS

Diccionariu de l'Academia de la Llingua Asturiana

Viodo en Camín de Cantares

Nós

Xentiquina

miércoles, 16 de marzo de 2011

25 años